తమిళనాడులో వధువులకు 8 గ్రాముల బంగారు నాణెం, పట్టు చీర.. కొత్త అన్నన్ సీర్ పథకం

ఈ పథకానికి తమిళనాడు ప్రభుత్వం పరిపాలనా, ఆర్థిక అనుమతులు జారీ చేసింది. అదే తేదీ నుంచి రాష్ట్రంలో వివాహం చేసుకునే అర్హులైన వధువులకు ఈ పథకం వర్తించనుంది. అయితే, దరఖాస్తు కోసం ప్రత్యేక వెబ్సైట్, అవసరమైన పత్రాలు, చివరి తేదీ వంటి పూర్తి మార్గదర్శకాలను ప్రభుత్వం ప్రత్యేకంగా విడుదల చేయాల్సి ఉంది.

ఆదాయ పరిమితి రూ.2.5 లక్షలు

కుటుంబ వార్షిక ఆదాయం రూ.2.5 లక్షలకు మించని వధువులకు ఈ పథకం ద్వారా ప్రయోజనం అందనుంది. వివాహం తమిళనాడు రాష్ట్రంలోనే జరగాల్సి ఉంటుంది. ఈ ఆదాయ పరిమితి ప్రభుత్వం విడుదల చేసిన ఉత్తర్వుల్లో పేర్కొంది. ఎన్నికల సమయంలో ప్రకటించిన హామీలో వార్షిక ఆదాయ పరిమితిని రూ.5 లక్షలుగా పేర్కొన్నప్పటికీ, అమలు ఉత్తర్వుల్లో దానిని రూ.2.5 లక్షలకు పరిమితం చేశారు.

సంప్రదాయానికి ప్రతీకగా పథకం

తమిళ సంప్రదాయంలో అన్న తన సోదరి వివాహ సమయంలో అందించే సీర్ కానుకకు ప్రతీకగా ఈ పథకాన్ని రూపొందించినట్లు ప్రభుత్వం తెలిపింది. వివాహ సమయంలో కుటుంబాలపై పడే ఆర్థిక భారాన్ని కొంతవరకు తగ్గించడంతో పాటు మహిళల సంక్షేమానికి తోడ్పడటమే పథకం ఉద్దేశమని పేర్కొంది. రాష్ట్రంలో ఏడాదికి సుమారు 5 లక్షల వివాహాలు జరుగుతాయని ప్రభుత్వం అంచనా వేసింది.

టెండర్ల ద్వారా కొనుగోళ్లు

అర్హులైన లబ్ధిదారులకు అందించే బంగారు నాణేలు, పట్టు చీరలను టెండర్ల ద్వారా కొనుగోలు చేయనున్నారు. తమిళనాడు టెండర్ల పారదర్శకత చట్టం, నిబంధనలకు అనుగుణంగా కొనుగోళ్లు చేపట్టాలని ప్రభుత్వం నిర్ణయించింది. బంగారం కొనుగోలు ధరను ఇండియా బులియన్ అండ్ జ్యువెలర్స్ అసోసియేషన్ నిర్ణయించే మార్కెట్ రేటు ఆధారంగా నిర్ణయించనున్నారు.

ఈ పథకాన్ని తమిళనాడు సామాజిక సంక్షేమం, మహిళా సాధికారత శాఖ అమలు చేయనుంది. అర్హత కలిగిన మహిళలు ఆన్లైన్లో దరఖాస్తు చేసుకునేలా ఏర్పాట్లు జరుగుతున్నాయి. పూర్తి అర్హత నిబంధనలు, దరఖాస్తు విధానం తదుపరి మార్గదర్శకాల ద్వారా వెల్లడయ్యే అవకాశం ఉంది.

తమిళనాడు ప్రభుత్వం అన్నన్ సీర్ పేరుతో కొత్త సంక్షేమ పథకాన్ని ప్రారంభించింది. ఈ పథకం కింద, వివాహం చేసుకునే అర్హులైన వధువులకు 8 గ్రాముల 22 క్యారెట్ల బంగారు నాణెం, పట్టు చీర అందిస్తారు. కుటుంబ వార్షిక ఆదాయం రూ.2.5 లక్షలకు మించని వారికి ఇది వర్తిస్తుంది. ఈ పథకానికి రూ.812 కోట్లు కేటాయించారు.